Ким ўзарга бўйлашган катта-кичик бинолар пештоқидаги қорлар тўкилиб, кўчалардаги муз йўлаклар эрий бошлаган, қуёшнинг заррин нурлари кўпайиб, борлиқда ўзгача тароват мавж ураётганидан, навбаҳор қадамлари яқин қолганини пайқаймиз.

Юртдошларимиз эгнидаги қалин, мўйнали либослар енгиллашиб, қадамларида яна-да шашт, шахдамлик сезилаётганидан, карнай-сурнайлар овози баландлашиб, келинчаклар сайли бошланаётганидан, остонада байрамлар, шодиёналар фасли турганини англаймиз.

Тақвимни оламиз-у, март ойи саналарига бир неча кунлар қолганини, майсалар кўрпасини очиб, ўрнидан турғазгувчи навбаҳор чопарлари яқинлашиб қолганини сезамиз. Ана шунда… яна бир кўкламга етганимиз, яна пешайвонларда буғдой кўкартириб, дошқозонларда сумалаклар қайнатишимиз, яна Наврўз сайлларида рақсга тушиб, кўксомсалар тайёрлашимиз мумкинлигини ўйлаб, шодланамиз. 
Юртимизга баҳор нақадар ярашади! Шойи рўмолларини шаббодалар елпиган, ҳарир, ипак кўйлакларида лолақизғалдоқлар сурати чизилган, қошларида ўсмалар, сочларига жамалаклар ярашиб турган  қизларимиз ҳуснига баҳорнинг рашки келади. Шунинг учундирки, ўзбек хонадонларини қайси фасл бўлмасин, нафосат, гўзаллик шукуҳи тарк этмайди.

Буғдойзорларни файзга кўмган, қут-барака олиб келувчи ёмғирлар мавсуми, зеболик, нафосат палласи, шодиёналар, гўзал айёмлар, янгиланиш-яшариш фасли бўлган Навбаҳор, биз сенга интиқмиз!

Муаллиф: Маърифат ТЕМУРЗОДА

Манба